ئەنجوومەنی وەزیران دوو تەوەر تاوتوێ دەکات

ئەمڕۆ چوارشەممە، 30-04-2025، ئەنجوومەنی وەزیرانی هەرێمی کوردستان بە سەرپەرشتیی سەرۆک وەزیران مەسرور بارزانی و ئامادەبوونی قوباد تاڵەبانی، جێگری سەرۆک وەزیران کۆ دەبێتەوە. 

لە کۆبوونەوەی ئەمجارەی ئەنجوومەنی وەزیرانی هەرێمی کوردستان گفتوگۆ لەسەر دوو تەوەری سەرەکی دەکرێت:

تەوەری یەکەم:

 خستنەڕووی دواپێشهاتەکانی پەیوەندیدار بە گفتوگۆ و دانوستانەکانی تایبەت بە دەستپێکردنەوەی هەناردەکردنی نەوتی هەرێمی کوردستان لەبەر ڕۆشنایی یاسای هەمواری یەکەمی یاسای بودجەی گشتیی عێراقی فیدراڵ و دەرئەنجامی کۆبوونەوەی نێوان هەردوو حکوومەتی هەرێمی کوردستان و حکوومەتی فیدراڵ لە ڕێکەوتی 19-04-2025، لە شاری بەغدا و دوا کۆبوونەوەی هاوبەشی نێوان حکوومەتی هەرێمی کوردستان و کۆمپانیا نەوتییەکان لە ڕێکەوتی 20-04-2025، بە ئامادەبوونی بریکاری وەزارەتی نەوتی فیدراڵ بۆ بەرهەمهێنان. 

تەوەری دووەم:

خستنەڕووی پێشنیاری ڕەشنووسی بڕیارێکی ئەنجوومەنی وەزیران بۆ ڕێکخستنەوەی دامەزراوەی بەڕێوەبردنی خانەنشینی گشتی لە هەرێمی کوردستان لەبەر ڕۆشنایی یاسای خانەنشینی یەکگرتوو ژمارە (9)ـی ساڵی 2014 و بڕیاری دادگای فیدراڵی لەمبارەیەوە، بە هۆی بەرفراوانبوونی سنووری دەسەڵات و ئەرک و چالاکییەکانی بەڕێوەبەرایەتیی گشتیی خانەنشینی.