دادگایەکی بەریتانیا له به‌رژه‌وه‌ندیی حكوومه‌تى هه‌رێمی كوردستان بڕیارێكی ده‌ركرد
دادگایەکی به‌ریتانى له شاری لەندەن، سزاى پێبژاردنى به‌سه‌ر کۆمپانیای (گەنێل ئێنێرجی) سه‌پاند کە چەندین ساڵە کاری وەبەرهێنانی نەوت لە هەرێمی کوردستان دەکات. به‌پێی بڕیاره‌كه‌ى دادگاكه، ده‌بێت كۆمپانیاكه 26.8 ملیۆن دۆلاری ئه‌مریكی وەک تێچووی یاسایی بدات بە حکوومەتی هەرێمی کوردستان. بڕیارى دادگاكه لە دوای دۆڕاندنی كۆمپانیاكه دێت له کەیسێکی یاسایی پەیوەست بە گرێبەستە هەڵوەشێنراوەکانی نێوانیان و حکوومەتی هەرێمی کوردستان.
ئاژانسی دەنگوباسی (رۆیتەرز) رایگەیادنووە کە رۆژی (هەینی 4ى 4ى 2025)، کۆمپانیای گەنێل ئێنێرجی سەبارەت بە دۆڕاندنی کەیسە یاساییەکەی بەرامبەر بە حکوومەتی هەرێمی کوردستان بەیاننامەیەکی بڵاوکردەوە و تیایدا رایگەیاند ” گەنێل ئێنێرجی، لەلایەن دادگای ناوبژیوانی نێودەوڵەتی لەندەنەوە فەرمانی پێکراوە بڕی 26.8 ملیۆن دۆلار لەگەڵ سوودەکەی بدات بە حکوومەتی هەرێمی کوردستان، هه‌رچه‌نده ئەو بڕە کەمترە لەو 36 ملیۆن دۆلارەی کە لە سەرەتادا حكوومه‌تى هەرێمی کوردستان داوای کردبوو”.
کەیسەکە لە ساڵی 2021 دەستی پێکرد کاتێک حکوومەتی هەرێمی کوردستان گرێبەستەکانی ئەو کۆمپانیایەی لە کێڵگە غازییەکانی بەنیباوی و میران بەتۆمەتی ئەوەی گەنێل ئێنێرجی نەیتوانیوە ئەو کێڵگانەی هەرێمی کوردستان بەپێی مەرجەکانی گرێبەستەکەیان، پەرەپێبدات، هەڵوەشاندەوە.
لە مانگی کانوونی یەکەمی 2024ـدا، دادگاکە بڕیارێكی لە بەرژەوەندی حکوومەتی هەرێمی کوردستان دا و رۆژی هەینیش سزای پێبژاردنەکەی بەسەر کۆمپانیای گەنێل ئێنێرجی دا، سەپاند.
ئەو دوو کێڵگەیە یەدەگێکی گەورەی گازی سروشتییان تێدایە. کێڵگەی بەنی باوی بە نزیکەیی 8.2 تریلیۆن پێ سێجا گازی سروشتی و 37 ملیۆن بەرمیل نەوتی تێدایە. قەبارەی خەمڵێنراو لە کێڵگەی میران بریتییە لە 6.6 تریلیۆن پێ سێجا گازی خاو و 93 ملیۆن بەرمیل نەوت و شلەگاز.
بەگوێرەی ئاژانسی رۆیتەرز، کۆمپانیای گەنێل ئێنێرجی کار لە چوار کێڵگەی هەرێمی کوردستان دەکات کە بریتین له: تەق تەق، سەرتە، تاوکێ و پێشخابوو. به‌پێی زانیارییه‌كانى ئاژانسه‌كه، کۆی یەدەگی نەوتی ئەو چوار کێڵگەیەی هەرێمی کوردستان دەگاتە نزیکەی 117 ملیۆن بەرمیل نەوت.