هێنانی گۆشتی سوور و سپی و بەرهەمە شیرەمەنییەکانی ئێران لەدەروازەی شەلامچە قەدەغە دەکرێت

ئەمڕۆ شەممە، 29ـی ئاداری 2025، دەستەی دەروازە سنووریەکانی عێراق ڕایگەیاند، بەگوێرەی ڕێنماییەکان هاوردەکردنی گۆشتی سوور و سپی و بەرهەمە شیرەمەنییەکانی ئێران لە دەروازەی شەلامچە قەدەغە دەکرێت، ئەمەش بەمەبەستی ڕێگریکردنە لە قاچاخچێتی ماددە هۆشبەرەکان.

عەلا قەیسی، گوتەبێژی دەستەی دەروزاە سنووریەکان ڕاگەیاند، لیستی ڕێنماییەکان هەموو جۆرە ‘ماسییەک، جۆرە جیاوازەکانی گۆشت، مریشک، خورما، هەروەها بەرهەمە شیرەمەنیەکان’ دەگرێتەوە. 

قەیسی ئاماژەی بەوەش کرد، قەدەغەکردنەکە تەنها ئەو کەلوپەلانە دەگرێتەوە کە هاووڵاتیان بە تاک لە ڕێگەی بازاڕکردنەوە لە ئێران دەیهێنن، بەڵام گواستنەوەی بازرگانی نێوان هەردوو وڵات ناگرێتەوە، ڕوونیشیکردەوە، قەدەغەکردنەکە بۆ ڕێگریکردنە لە قاچاخچێتی ماددەی هۆشبەر کە لەناو ئەو بەرهەمانە دەشارنەوە، ئەمەش دەستنیشانکردنیان سەخت دەبێت.

دەستەی دەروازە سنوورییەکانی عێراق ئەمڕۆشەممە، دەستگیرکردنی گەشتیارێکی بیانی لەکاتی هەوڵدان بۆ بەقاچاخهێنانی 1450 گرام ماددەی کریستاڵ ڕاگەیاند.