پەرلەمانی عێراق بۆ تاوتوێکردنی پرۆژەیاسای بە پارێزگابوونی هەڵەبجە كۆدەبێتەوە

بە گوێرەی فەرمانگەی ڕاگەیاندنی پەرلەمانی عێراق، کاتژمێر 08:00ـی ئەمشەو، سێشەممە، 25-03-2025، پەرلەمان بۆ تاوتوێکردنی شەش بڕگە کۆ دەبێتەوە. بڕگەی یەکەمی کۆبوونەوەکەش، دەنگدانە لەسەر پرۆژەیاسای بە پارێزگابوونی هەڵەبجە لە هەرێمی کوردستان. 

پرۆژەیاسای بە پارێزگابوونی هەڵەبجە خوێندنەوەی یەکەم و دووەمی بۆ کراوە، بەڵام چەندین جار بەهۆی دژایەتیی لایەنە عێراقییەکان، دەنگدان لەسەری دواخراوە. ئەگەر پرۆژەیاساکە پەسەند بکرێت، هەڵەبجە دەبێتە چوارەمین پارێزگای هەرێمی کوردستان لە دوای هەولێر، سلێمانی و دهۆک. 

دوێنێ دووشەممە، 24-03-2025، شاخەوان عەبدوڵلا، جێگری دووەمی سەرۆکی پەرلەمانی عێراق لە لێدوانێکی ڕۆژنامەوانیدا ڕایگەیاند، لەگەڵ فراکسیۆنەکانی پەرلەمان قسەیان کردووە بۆ ئەوەی پرۆژەیاسای بە پارێزگابوونی هەڵەبجە تێپەڕێنرێت.

جێگری سەرۆکی پەرلەمانی عێراق، ئاماژەی ئەوەشی خستە ڕوو، بەو هەنگاوە، داوای سەرۆک بارزانی لە سەرۆکایەتیی پەرلەمان و ئەو بەڵێنەش بە نوێنەر و کەسایەتییەکانی هەڵەبجەیان داوە، جێبەجێ دەکرێت.

حکوومەتی هەرێمی کوردستان، ڕۆژی 13-03-2014، لە سەردەمی نووری مالیکی، سەرۆک وەزیرانی پێشووتری عێراق، بڕیاری بە پارێزگاکردنی هەڵەبجەی دەرکرد، بەڵام ڕێگرییەکانی لایەنە سیاسییەکانی بەغدا بووەتە هۆی ئەوەی چوارەم پارێزگای هەرێمی کوردستان بێ دانپێدانانی فەرمی و بودجەی تایبەت بمێنێتەوە.