پۆلیسی سلێمانی ڕاگەیەندراوێکی دەربارەی ڕووداوەکەی سەیدسادق بڵاوکردەوە
پۆلیسی سلێمانی ڕایگەیاند، لێکۆڵینەوەکان بۆ ئاشکراکردنی هۆکاری ڕووداوەکەی گوندی گرێزەی سەیدسادق بەردەوامن کە تێیدا کەسێک پێنج ئەندامی خێزانەکەی کوشت و پاشان کۆتایی بە ژیانی خۆیشی هێنا.
ئەمڕۆ پێنجشەممە، پۆلیسی پارێزگای سلێمانی ڕاگەیەندراوێکی دەربارەی ڕووداوەکەی دوێنێ شەوی قەزای سەیدسادق بڵاوکردەوە و تێیدا هاتووە: دوای ئه‌وه‌ی كاتژمێر 11:10 خوله‌كی شه‌وی ڕابردوو (2025/3/19) هێزه‌كانی پۆلیس ئاگادار كرانه‌وه له‌ڕووداوێكی ته‌قه‌كردن له‌ماڵێكی گوندی گرێزه‌ی سه‌ر به‌قه‌زای سه‌یدسادق، ده‌ستبه‌جێ مه‌فره‌زه‌كانی بنكه‌ی پۆلیسی سه‌یدسادق گه‌یشتنه شوێنی ڕووداوه‌كه.
ڕاشیگەیاند، به‌پێی لێكۆڵینه‌وه سه‌ره‌تاییه‌كانی پۆلیس ده‌ركه‌وت كه به‌هۆی كێشه‌ی خێزانییه‌وه یه‌كێك له‌ئه‌ندامانی خێزانه‌كه به‌ناوی (به‌شیر سالار محەمەد له‌دایكبووی 1998) به‌چه‌كی جۆری كڵاشینكۆف ده‌ستڕێژی له‌ئه‌ندامانی خێزانه‌كه‌ی كردووه كه پێكهاتوون له‌باوك‌و دایكی‌‌و دوو خوشك‌و برایه‌كی كوشتووه، دواتر خۆشی كوشتووه.
ئەوەشی خستەڕوو کە له‌لایه‌ن تیمه‌كانی به‌ڵگه‌ی تاوانه‌وه كه‌شف‌و هێڵكاری بۆ شوێنی ڕووداوه‌كه ئه‌نجامدراو سه‌رجه‌م به‌ڵگه‌كان كۆكرانه‌وه‌و ده‌ستبه‌ر ئه‌و چه‌كه‌دا گیرا كه تاوانه‌كه‌ی پێ ئه‌نجامدراوه، هه‌روه‌ها ته‌رمه‌كان بۆ پزیشكی دادوه‌ری گواسترانه‌وه.
پۆلیسی سلێمانی ڕایگەیاند، به‌بڕیاری دادوه‌ر په‌ڕاوی لێكۆڵینه‌وه بۆ ڕووداوه‌كه كراوه‌ته‌وه‌و لێكۆڵینه‌وه‌كانی پۆلیس به‌رده‌وامه بۆ ئاشكراكردنی هۆكاری ڕووداوه‌كه.
كوژراوه‌كانیش پێكهاتووه له:
سالار محەمەد عه‌بدولكه‌ریم له‌دایكبووی 1970
نیهاد قادر ساڵح له‌دایكبووی 1975
سیما سالار محەمەد له‌دایكبووی 2005
سه‌هه‌ند سالار محەمەد له‌دایكبووی 2015
یارا سالار محەمەد له‌دایكبووی 2018
به‌شیر سالار محەمەد له‌دایكبووی 1998 (بكوژ)