مەسروور بارزانی: قوتابیان و لاوان ڕۆڵی کاریگەریان لە داکۆکیکردن لە مافەکانی خەڵکی کوردستان گێڕاوە

جێگری سەرۆکی پارتی دیموکراتی کوردستان، لە پەیامێکدا ساڵیادی دامەزراندنی هەردوو ڕێکخراوی یەکێتیی قوتابیانی کوردستان و یەکێتیی لاوانی دیموکراتی کوردستان پیرۆز دەکات و دەڵێت، یەکێتیی قوتابیانی كوردستان و یەکێتیی لاوانی دیموکراتی کوردستان، مێژوویەکی درەوشاوەیان لە خەباتی ڕێکخراوەییان و خزمەتکردنی قوتاییان و لاوان و بەرگریکردن لە ماف و داخوازییەکانیان و پەرەپێدانی تواناکانیان هەبووە.

ئەمەی خوارەوە دەقی پەیامەکەیە:

لە یادی هەژدەی شوبات، حەفتا و دووەمین ساڵیادی دامەزراندنی هەردوو ڕێکخراوی یەکێتیی قوتابیانی کوردستان و یەکێتیی لاوانی دیموکراتی کوردستان، گەرمترین پیرۆزبایی ئاراستەی مەکتەبی سکرتارییەت و ئەندامانی هەردوو یەکێتیی قوتابیان و لاوانی دیموکراتی کوردستان دەکەم و هیوای پێشکەوتنیان بۆ دەخوازم. 

یەکێتیی قوتابیانی كوردستان و یەکێتیی لاوانی دیموکراتی کوردستان، مێژوویەکی درەوشاوەیان لە خەباتی ڕێکخراوەییان و خزمەتکردنی قوتاییان و لاوان و بەرگریکردن لە ماف و داخوازییەکانیان و پەرەپێدانی تواناکانیان هەبووە. هەروەها ڕۆڵێکی دیار و کاریگەریشیان لە بزووتنەوەی ڕزگاریخوازی کوردستان و خەباتی نیشتمانیی و نەتەوەییمان و داکۆکیکردن لە مافەکانی خەڵکی کوردستان و دەسکەوتە نیشتمانییەکان گێڕاوە. 

یەکێتیی قوتابیانی كوردستان و یەکێتیی لاوانی دیموکراتی کوردستان، فێرگەیەکی دەوڵەمەند و سوودبەخشی پێگەیاندنی دەیان سەرکردەی بەتوانا و لێهاتووی کوردستانیش بوون و بە شانازییەوە،  منیش ئەندام و کادیری قوتابیان و لاوان بووم.

ئێستاش کە ئەم دوو ڕێکخراوە تێکۆشەرە هەوڵەکانیان چڕکردووەتەوە و ئامادەکارییەکانیان تەواو کردووە بۆ یەکگرتنەوە، ئومێدەوارم لە کار و تێکۆشانی خۆیان لە پێناو پێشخستنی خەباتی ڕێکخراوەییان بە شێوازێکی پێشکەوتووتر کە لە ئاست پێشکەوتنەکانی ئەم سەردەمەدا بێت، بەردەوام بن و هەمیشە لە بەرەوپێشچوون و پێشەنگبوون و نوێبوونەوە و داهێناندا بن و بە باشترین و پێشکەوتووترین شێوە، خزمەتی نەوەی نوێ و قوتابیان و لاوانی کوردستان بکەن و لەم ڕووەوە، هەموو پشتیوانییەکی خۆمیان بۆ دووپات دەکەمەوە. 

یادی هەژدەی شوبات پیرۆز بێت و هەر سەرکەوتوو بن. 

مەسروور بارزانی

جێگری سەرۆکی پارتی دیموکراتی کوردستان

2025/2/18

.