ئەمڕۆ پەرلەمانی عێراق بۆ دەنگدان لەسەر هەمواری یاسای بودجە کۆ دەبێتەوە.
بەگوێرەی نوسینگەی ڕاگەیاندنی پەرلەمانی عێراق، بڕیارە ئەمڕۆ یەکشەممە، 2ـی شوباتی 2025، کاتژمێر یەکی دوای نیوەڕۆ، پەرلەمانی عێراق، بۆ دەنگدان لەسەر هەمواری یاسای بودجەی سێ ساڵەی عێراق و ماددەی تایبەت بە هەناردەکردنەوەی نەوتی هەرێمی کوردستان کۆ ببێتەوە.
هاوکات، مەحموود مەشهەدانی، سەرۆکی پەرلەمانی عێراق بە میدیاکانی گوت: دەیانەوێت هەمواری یاسای بودجە وەک ئەوەی لە ئەنجوومەنی وەزیرانەوە هاتووە تێپەڕێنن.
31ـی مانگی ڕابردوو، محەممەد شیاع سوودانی، سەرۆک وەزیرانی عێراق لەگەڵ سەرۆک فراکسیۆنەکانی پەرلەمان کۆبووەوە، دوای کۆبوونەوەش ڕێککەوتن لەسەر تێپەڕاندنی هەمواری یاسای بودجە وەک ئەوەی لە ئەنجوومەنی وەزیرانەوە هاتووە.
هاوکات ڕۆژی پێنجشه‌ممه، 30ـی كانوونی دووه‌می 2025، په‌رله‌مانی عێراق خشته‌ی كۆبوونه‌وه‌ی ئەمڕۆ یه‌كشه‌ممه‌ی بڵاو كرده‌وه کە چوار بڕگە دەبێت، بڕگه‌ی یه‌كه‌می تایبه‌تە به ده‌نگدان له‌سه‌ر پرۆژه‌یاسای هه‌مواری یه‌كه‌می یاسای بودجه‌ی گشتیی فیدراڵییە بۆ ساڵه‌كانی 2023، 2024 و 2025ـی ژماره 13ـی ساڵی 2023.
هه‌روه‌ها بڕگه‌ی دووه‌می كۆبوونه‌وه‌كه په‌یوه‌سته به ده‌نگدان له‌سه‌ر پرۆژه‌یاسای هه‌مواری یه‌كه‌می یاسای بنه‌ماكانی یه‌كسانكردنه‌وه‌ی بڕوانامه و پله زانستییه‌كان، ژماره 20ـی ساڵی 2020.
په‌رله‌مانی عێراق له بڕگه‌ی سێیه‌مدا ده‌نگ له‌سه‌ر چەند ڕاسپاردەیەکی وه‌زاره‌تی په‌روه‌رده ده‌دات.
بڕگه‌ی چواره‌می دانیشتنه‌كه‌ش تایبه‌ت ده‌بێت به گفتوگۆ و خوێندنه‌وه‌ی دووه‌می پرۆژه‌یاسای خوێندنی باڵا له زانكۆ ناحكوومییه‌كاندا.
ڕۆژی چوارشەممە 29ـی کانوونی دووەمی 2025، کۆبوونەوەی محه‌ممه‌د شیاع سوودانی، سه‌رۆك وه‌زیرانی عێراق لەگەڵ سەرۆکی فراکسیۆنەکانی پەرلەمان به‌ڕێوه چوو. ڤیان سەبری، سەرۆکی فراکسیۆنی پارتی لە پەرلەمانی عێراق له‌م باره‌وه بە کوردستان24ـی گوت: سەرۆک وەزیران، داوای لە سەرۆک فراکسیۆنەکان کردووە دەنگ لەسەر ئەو هەموارە بدەن کە ئێستا لە پەرلەمانە و تەنیا دەنگدانی ماوە تاوەکوو دووبارە هەناردەی نەوتی هەرێم دەست پێ بکاتەوە.
سەرۆکی فراکسیۆنی پارتی ئاماژەری بەوەش کرد، لە کۆبوونەوەکەدا لێکگەشتنێکی گشتی پەسەند کراوە بۆ تێپەڕاندنی هەمواری یاسای بودجە تایبەت بە دووبارە دەست پێ کردنەوەی هەناردەی نەوتی هەرێمی کوردستان.