ڕاگەیەنراوی كۆبونەوەی هاوبەشی پارتی و یەكێتی
دوای كۆبونەوەی پارتی و یەكێتی لە پیرمام ڕاگەیەنراوێكی هاوبەشیان بڵاوكردەوە كە تێدا هاتووە
هەردوو شاندى پارتى دیموکراتى کوردستان و یەکێتىى نیشتمانیى کوردستان لە کۆبوونەوەکەدا، بارودۆخى ناوچەکە و ئەو گۆڕانکاریانەى کە هاتوونەتە ئاراوە و کاریگەرییان لە سەر عێراق و هەرێمى کوردستان، خرانە بەرباس. هەردوولا کۆک بوون لەسەر تەبایى و هاوهەڵوێستى لە پارێزگاریکردنى بەرژەوەندییە باڵاکانى هەرێمى کوردستان لەم قۆناغە هەستیارەدا.
لە تەوەرێکى دیکەى کۆبوونەوەکەدا، باس لە هەنگاوەکانى پێکهێنانى کابینەى تازەى حکومەتى هەرێم و هەنگاوەکانى پێویست بۆ سەرخستنى ئەو پرۆسەیە کرا، هەردوولا هاوڕابوون کە بە زووترین کات کار لەسەر ئامادەکردنى بەرنامەیەکى هاوبەش بۆ ئەو بنەمایانەى کە حوکمڕانیى کوردستانیان بۆ قۆناغى ئایندە لەسەر بەڕێوەدەچێت بکەن، بەشێوەیەک کە پارێزگارى لە پێگە و سەقامگیریى هەرێمى کوردستان و ماف و بەرژەوەندییەکانى هاووڵاتیان و سەرجەم پێکهاتەکانى بکات.
لەم ڕووەوە بڕیاردرا لیژنەیەکى هاوبەش کار لەسەر ئامادەکردنى ڕەشنووسى ئەو بەرنامەیە بکات بۆ کۆبوونەوەى ئایندە.