ئەمڕۆ نێچیرڤان بارزانی سەردانی بەغدا دەكات
بڕیاره ئه‌مرۆ شەممە سه‌رۆكی هه‌رێمی كوردستان سه‌ردانی به‌غدا بكات و له‌گه‌ڵ سەركردەكانی هاوپه‌یمانی به‌ڕێوه‌بردنی ده‌وڵه‌ت كۆببێته‌وه.
به‌پێی زانیارییه‌كان له به‌غدا، بڕیاره ئه‌مرۆ شەممە نێچیرڤان بارزانی سەرۆکی ھەرێمی کوردستان سه‌ردانی به‌غدا بكات و ئامانجی سه‌ردانه‌كه كۆبوونه‌وەیە له‌گه‌ڵ سەركردەكانی هاوپه‌یمانی به‌ڕێوه‌بردنی ده‌وڵه‌ت بۆ دیاریكردن و یه‌كلایی كردنه‌وه‌ی كێشه‌ی سه‌رۆكی ئه‌نجوومه‌نی نوێنه‌رانی عێراقه.
هەفتەی رابردوو دلشاد شەهاب گوتەبێژی سەرۆکایەتیی هەرێمی کوردستان لە کۆنگرەیەکی رۆژنامەڤانیدا رایگەیاندبوو كە بەم نزیکانە نێچیرڤان بارزانی سەردانی بەغدا دەکات و لەگەڵ هاوپەیمانیی دەوڵەت کۆ دەبێتەوە.
به‌پێی زانیارییه‌كان له كۆبوونه‌وه‌ی هاوپه‌یمانی به‌ڕێوه‌بردنی ده‌وڵه‌ت، محەمەد شیاع سوودانى سەرۆک وەزیرانی عێراقیش یه‌كێك ده‌بێت له به‌شداربووان.
به بڕیارێكی دادگه‌ی فیدڕاڵی عێراق له رۆژی 14ی تشرینی دووه‌می ساڵی رابردوو ئه‌ندامێتی په‌رله‌مان له محه‌مه‌د حه‌لبووسی سه‌رۆكی ئه‌و كاتی په‌رله‌مان سه‌ندرایه‌وه و به‌و هۆیه‌شه‌وه تا ئێستا پۆستی سه‌رۆكی په‌رله‌مان به‌وه‌كاله‌ت به‌ڕێوه ده‌برێت