نرخی كیلۆیەك تەماتە لە شاری سلێمانی نزیك بوەتەوە لە 2 هەزار دینار

بەهۆی هاتنی مانگی ڕەمەزان و زیادبوونی خواستی هاووڵاتییان لەسەر بەرهەمی تەماتە و کەمی خستنەڕوو لە بازاڕەکاندا، نرخی تەماتە لە بازاڕەکانی هەرێمی کوردستان بەرزبوونەوەی بەخۆیەوە بینیووە و نزیکە لە 2000 دینار.

سەروەر عەتا، سەرۆکی سەندیکای عەلوەی سلێمانی ڕایگەیاند، کیلۆیەک تەماتە لە بەیانی ئەمڕۆدا لە عەلوە بە 1200 دینار فرۆشراوە، تا دەگاتە دەستی کڕیار لە بازاڕ و دووکانە بەقاڵییەکان نرخەکەی نزیکدەبێتەوە لە دوو هەزار دینار.

ئاماژەی بەوەشکرد، ئەو تەماتەیەی لە ناوچەکانی هەرێم هەن لە ناوچەکانی دیکەی عێراقەوە دێت و لە دەرەوەی عێراقەوە تەماتە هاوردە ناکرێت و بە بڕیارێکی وەزارەتی کشتوکاڵی عێراق هاوردەکردنی تەماتە ڕاگیراوە.

وەزارەتی کشتوکاڵی عێراق هاوردەکردنی تەماتەی ڕاگرتووە، بە مەبەستی ئەوەی نرخی تەماتە ناوچەکانی بەسڕە، ناسڕییە و زوبێر دانەبەزێت و زیان بە جوتیاران نەگات، بەڵام ئێستا بەهۆی ئەوەی خواستی خەڵک لەسەر بەرهەمە کشتوکاڵییەکە زیاترە لەوەی کە لە بازاڕەکاندا هەیە، نرخەکەی بەرزبووەتەوە و بارگرانی لەسەر هاووڵاتییان دروستکردووە.