سه‌رۆك بارزانی: ئیرادەی گەلی كوردستان سەركەوت و دوژمنان و تاوانباران كەوتنە زبڵدانی مێژوو
سه‌رۆك مه‌سعود بارزانی، په‌یامێكی له‌یادی سی و چوار ساڵەی ئەنفالی بادینان بڵاوكرده‌وه.
ده‌قی په‌یام:
پەیامی سەرۆك بارزانی لە یادی سی و چوار ساڵەی ئەنفالی بادینان
بەناوی خودای مەزن و دلۆڤان
لە بیست و پێنجی ئابی 1988 هەتا شەشی ئەیلوولی 1988 لەدرێژەی زنجیرە تاوانەكانی ڕژێمی عێراق لەدژی خەڵكی كوردستان، بەشێكی زۆری ناوچە و گوندەكانی دەڤەری بادینان كەوتنە بەر هەڵمەتی نامرۆڤانەی كیمیابارانكردن و گرتن و كوشتن و ڕاگواستن و ئەنفالی هاووڵاتیانی بێ تاوان لە لایەن هێزەكانی ڕژێمی ئەو كاتی عێراقدا. لە ئەنجامی ئەو تاوانە نامرۆڤانەیە بە هەزاران هاووڵاتیی كوردستان شەهید و بێ سەروشوێن و ئاوارە كران و سەدان گوندیش خاپوور بوون.
مەبەستی ڕژێم لەو ڕەفتارە شۆڤینی و ئەو تاوانە گەورەیە گۆڕینی دیموگرافی كوردستان و شكاندنی ئیرادەی گەلی كوردستان لەڕێگەی چەك و زەبروزەنگ و ستەمكاری بوو. بەڵام ئیرادەی گەلی كوردستان بۆ مانەوە و ئازادیخوازی سەركەوت و ئەوە دوژمنان و نەیاران و تاوانباران بوون كە كەوتنە زبڵدانی مێژوو.
لە یادی سی و چوار ساڵەی تاوانی ئەنفالی بادینان سڵاو بۆ گیانی پاكی شەهیدانی کۆمەڵکوژیی کوردانی فەیلی و ئەنفالی بادینان و گەرمیان و بارزان و هەموو شەهیدانی ڕێگەی ئازادیی كوردستان دەنێرین. لەو یادە دڵتەزێنەدا ڕایدەگەیێنین كە گەلەكەمان هەرگیز زمانی زۆرداری و تاوان قبووڵ ناكات و دەبێ دەوڵەتی عێراقیش قەرەبووی هەموو ئەو تاوان و ستەمەكارییانە بدات كە لەدژی میللەتەكەمان ئەنجام دراوە.
مسعود بارزانی
25ی ئابی 2022