راپۆرتێكی بەریتانی: نەناردنی مووچەی فەرمانبەرانی كوردستان، هەرەس بە حكوومەتەكەی سوودانی دەهێنێ
بەپێی راپۆرتی سەنتەرێكی بەریتانی، حكوومەتەكەی محەمەد شیاع سوودانی، بەهۆی چەند قەیرانێكەوە كە یەكێكیان نەناردنی مووچەی فەرمانبەرانی هەرێمی كوردستانە، لەژێر هەڕەشەی هەرەسهێناندایە.
لەو راپۆرتەدا كە (سەنتەری جیهانی بۆ لێكۆڵینەوەكانی گەشەسەندن) ئامادەی كردووە و پێگەی (درەومیدیا)ی سلێمانی وەریگێڕاوەتە سەر زمانی كوردی، ئاماژە بەوە دراوە كە بەهۆی چوار قەیرانی ئابوورییەوە، حكوومەتەكەی محەمەد شیاع سوودانی لەم زوانە هەڕەشەی هەرەسهێنانی ڕووبەڕوو دەبێتەوە.
ڕوونیشی كرووتەوە: ”توانای سوودانی بۆ جێبەجێكردنی پرۆگرامی حكوومەت سنووردارە، لەبەر رۆشنایی بڕینی مووچەی فەرمانبەرانی هەرێمی كوردستان. هەروەك حكوومەتی هەرێمی كوردستان ئەو هەنگاوە بە سیاسەتی برسیكردن دژی گەلی كوردستان ناو دەبات.“
سەنتەرەكە گومانی خستووەتە سەر بڕیارەكانی عێراق لە دژی خەڵكی كوردستان و لە لێكۆڵینەوەكەیدا دەڵێت: ”ساتەوەختی بڕیاڕەكانی بەغدا جێگەی نیشانەی پرسیاری زۆرە، بڕیاڕەكان بەشێك نین لە كارنامەی حكوومەتی سوودانی كە بریتی بووە لە خۆلادان لە گرتنەبەری هەر رێوشوێنێك دژی هەرێمی كوردستان و پەلەنەكردن سەبارەت بە كۆمپانیا نەوتییەكان بۆ ئەوەی زیان بە ئابووریی نیشتمانی نەگات. بەڵام ئەو گۆڕانە كتوپڕە لە سیاسەتی حكوومەتی فیدڕاڵی، رەنگە كاریگەریی نەرێنی هەبێت لەسەر پیشەسازیی نەوت لە هەرێمی كوردستان كە زۆرینەی كۆمپانیا بیانییەكان لە كاركردن وەستاون، ئەوەش بووەتە هۆی پاشەكشەكردنی داهاتە داراییەكانی هەرێمی كوردستان.“
هەروەك ئاماژەشی بەو هێرشە مووشەكییانە كردووە كە ماوە نا ماوە دەكرێنە سەر كێڵگە نەوتییەكانی هەولێر و سلێمانی، لە كاتێكدا بەغدا پلان دادەنێت بۆ زیادكردنی بەرهەمهێنان لە یەكێك لە گەورەترین كێڵگەكانی غاز لە هەرێمی كوردستان كە كێڵگەی كۆرمۆرە و دەیەوێ بەرهەمەكەی لە (450) ملیۆن مەتر سێجای رۆژانەوە بۆ ملیارێك مەتر سێجا بەرز بكاتەوە، بەڵام ”بۆردومانە مووشەكییەكان بەربەستیان بۆ ئەم پلانە دروست کدووە.”
هەر بەپێی هەمان ڕاپۆرت، سەرهەڵدانی قەیرانی (خۆر عەبدوڵا) لە نێوان كوێت و عێراق، یەكێكی دیكە دەبێت لە هۆكارەكانی هەرەسهێنانی حكوومەتەكەی سوودانی، بەهۆی ئەوەی ئەم قەیرانە فشارەكانی لەسەر حكوومەتی سوودانی زیاتر كردووە، بەتایبەت دوای هەڵوەشاندنەوەی ئەو رێككەوتنە لەلایەن دادگای باڵای فیدڕاڵیی عێراقەوە، ”ئەو هەنگاوەش حكوومەتی سوودانیی خستووەتە دۆخێكی ناهەموارەوە كە لە هەوڵدایە بۆ راكێشانی وەبەرهێنانی وڵاتانی كەنداو، بەتایبەت لە بواری وزە و بەستنەوەی كارەبا و وەبەرهێنان لە بواری غاز و وزەی خاوێن.“
لە كۆتاییشدا ئەوە دووپات كراوەتەوە كە ئەو دۆخەی لە عێراق دەگوزەرێت، هەڕەشەیە بۆ سەر سەقامگیریی وڵاتەكە و كۆتاییهاتنی ئەو مانگی هەنگوینیەیە كە حكوومەتی سوودانی چەند مانگێكە تێیدا دەژی.