پارتی و یەکێتی گفتوگۆ لەبارەی ئەنجامدانی هەڵبژاردن دەکەن

بڕیارە ئەمڕۆ مەکتەبی سایسی پارتی دیموکراتی کوردستان و یەکێتی نیشتمانی کوردستان لە هەولێر کۆببنەوەو گفتوگۆ لەبارەی ئەنجامدانی هەڵبژاردنی داهاتووی پەرلەمانی کوردستان بکەن.

ئەم کۆبوونەوەیەی نێوان پارتی و یەکێتی دوای ئەوە دێت کە 16ی ئەم مانگە شاندی هەردوولا لە بارەگای مەکتەبی سیاسی یەکێتی لە سلێمانی کۆبوونەوە و رایانگەیاند: “هەردوو لا بڕیارماندا وەک  یەک تیم کار بکەین و زنجیرەیەک کۆبوونەوەی دیکەش  ئەنجامبدرێت بۆ فەراهەمکردنی کەش و هەوای لەبار لە رووی یاسایی و سیاسییەوە بۆ ئەنجامدانی هەڵبژاردن و رووبەڕووبونەوەی ئەو تەحەدیاتانەی لە ناوچەکەدا هەن”.

دوای دەستپێشخەرییەکەی سەرۆک بارزانی بۆ گفتوگۆ و یەکخستنەوەی نێو ماڵی کورد، کۆبوونەوە و دانوستان لەنێوان لایەنەکان بەتایبەتی پارتی و یەکێتی هاتووەتە ئاراوە، بۆ ئەوەی هەڵبژاردنی پەرلەمانی کوردستان لە وادەی دیاریکراودا ئەنجامبدرێت.