پەیامێک لە سەرۆکی حکومەتی هەرێمی کوردستانەوە
سەرۆکی حکومەتی هەرێمی کوردستان لەبارەی هێرشەکەی شارۆچکەی جندرێسی سەر بە شاری عەفرین لە رۆژئاوای کوردستان بۆسەر چەند هاووڵاتییەکی کورد کە ئاهەنگی نەورۆزیان دەگێڕا، پەیامێکی بڵاوکردەوە.
ئەمڕۆ سێشەممە (21ـی ئادار/مارسی 2023)، مەسرور بارزانی، سەرۆکی حکومەتی هەرێمی کوردستان پەیامێکی بڵاوکردەوە و تێیدا هاتووە، “ئێوارەی دوێنێ لە شارۆچکەی جندرێسی سەر بە شاری عەفرین، لە لایەن چەند کەسێکەوە ، هێرش کرایە سەر ئاهەنگگێڕان و ئاگرهەڵکردن بە بۆنەی جەژنی نەورۆزەوە، لە ئەنجامدا بە داخێکی زۆرەوە، چوار هاووڵاتی کورد شەهید کران”.
هەروەها سەرۆکی حکومەتی هەرێمی کوردستان، پرسە و سەرەخۆشی لە بنەماڵەی قوربانییەکان کردووە و وێڕای دەربڕینی هاوخەمی، هیوای چاکبوونەوەی بۆ بریندارەکان خواستووە.
هەر لەو پەیامەدا، سەرۆکی حکومەتی هەرێمی کوردستان رایگەیاندووە، “بە توندترین شێوەش، ئەم تاوانە سەرکۆنە دەکەین و داوا لە بەرپرسانی ناوچەکە دەکەین، لێپرسینەوەی پێویست بکەن و ئەنجامدەرانی تاوانەکە، بە سزای یاسایی خۆیان بگەیەنن”.
دەقی پەیامەکەی سەرۆکی حکومەتی هەرێمی کوردستان
ئێوارەی دوێنێ لە شارۆچکەی جندرێسی سەر بە شاری عەفرین، لە لایەن چەند کەسێکەوە ، هێرش کرایە سەر ئاهەنگگێڕان و ئاگرهەڵکردن بە بۆنەی جەژنی نەورۆزەوە، لە ئەنجامدا بە داخێکی زۆرەوە، چوار هاووڵاتی کورد شەهید کران. پرسە و سەرەخۆشی لە بنەماڵەی قوربانییەکان دەکەین و هاوخەمیانین و هیوای چاکبوونەوە بۆ بریندارەکان دەخوازین. بە توندترین شێوەش، ئەم تاوانە سەرکۆنە دەکەین و داوا لە بەرپرسانی ناوچەکە دەکەین، لێپرسینەوەی پێویست بکەن و ئەنجامدەرانی تاوانەکە، بە سزای یاسایی خۆیان بگەیەنن.
مەسرور بارزانی
سەرۆکی حکومەتی هەرێمی کوردستان