فازڵ میرانی: ئه‌وه‌ی كراوه بارزانی كردوویه‌تی و مێژووش به بارزانی ده‌ست پێ ده‌كاته‌وه
لە کۆڕێکدا بە بۆنەی 120مین ساڵیادی له‌دایكبوونی بارزانیی نه‌مر، فازڵ میرانی، به‌رپرسی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان، ڕایگه‌یاند، لێکۆڵینەوەیەک لەسەر ڕووداوەکانی ڕۆژهەڵاتی ناوەڕاست هەبێت، سەرەتا و کۆتاییەکەی بە ناوی بارزانی تەواو دەبێت.
فازڵ میرانی ئاماژەی بەوە دا: ”لێكۆڵینه‌وه‌یه‌ك هه‌بێت له‌سه‌ر ڕووداوه‌كانی ڕۆژهه‌ڵاتی ناوه‌ڕاست و باسی میلله‌تی كورد و شۆڕشه‌كانی كوردستان، له شێخ عه‌بدولسه‌لامی گه‌وره‌وه تا ئه‌مڕۆ باسی بارزانیی تێدا دەبێت و ئه‌مڕۆش كه مێژوو ده‌ست پێ ده‌كاته‌وه، هەر به بارزانی ده‌ست پێ ده‌كاته‌وه، كۆتاییه‌كه‌شی به‌وه دێت، ئه‌وه‌ی كراوه، بارزانی كردوویه‌تی، یه‌كێك چۆن باسی ده‌كا و ئه‌وی تر چۆن باسی ده‌كا، ئه‌وه شتێكی دیكه‌یه، به‌ڵام گرنگه‌كه‌ی به ناوی بارزانی ته‌واو ده‌بێت.”
به‌رپرسی ده‌سته‌ی كارگێڕیی مه‌كته‌بی سیاسیی پارتی دیموكراتی كوردستان گوتیشی: ”ئازادی، مرۆڤایه‌تی، دادپه‌روه‌ری، ئازایه‌تی، كۆڵنه‌دان، پاراستنی میلله‌ت، هه‌وڵدان بۆ گه‌یشتن بە ئامانجەکان به‌پێی توانای به‌رده‌ست و ئەوەی کە چۆن ئه‌و ئامانجانه جێبه‌جێ بكا، هەروەها لێخۆشبوون له كه‌سێك له كاتی به‌هێزی و خۆنه‌چه‌ماندن (به‌و چه‌مكه‌ی سه‌رۆك بارزانی ده‌ڵێ) به‌رانبه‌ر دوژمن، خۆدوورگرتن له ته‌ماح، هه‌مووی ئەمانە له خاسیه‌تی ڕێبازی بارزانییه.”
ڕوونیشی کردەوە: ”ڕێگای ڕێبازی بارزانی ته‌نیا پارتایه‌تی نییه، پارتایه‌تی یه‌كێكه له ڕیگاكان، ڕێگای دیکەش هەیە، وەک نیشتمانپه‌وروه‌ری، مرۆڤ ده‌توانێت نیشتمانپه‌روه‌ر بێت و حزبی نه‌بێت. به‌ڵام ڕێبازی بارزانی ڕوونی ده‌كاته‌وه له ڕێگه‌ی باوه‌ڕبوون به‌و ڕێبازه ڕوو له‌م حزبه بكه‌یت.”