سەرۆکی نوێنەرایەتیی حکومەتی هەرێمی کوردستان لە بەغدا دەڵێت، هەموو رێکارەکانی ناردنی 400 ملیار دینارەکە لە رێگەی بانکی TBIیەوە بۆ هەرێمی کوردستان تەواوکراون
ئەمڕۆ یەکشەممە، 12-03-2023، فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا دەڵێت پێشتر بە بڕیاری ئەنجوومەنی وەزیران شاندێک بۆ دانوستاندن لەگەڵ بەغدا پێکهێندراوە و شاندەکە هەمان شاندەکەی پێشووە، لەلایەن حکومەتی فیدراڵیی عێراقیشەوە شاندێک بە سەرۆکایەتیی د. محەممەد تەمیم، وەزیری پلاندانانی عێراق پێکهێندراوە بۆ گفتوگۆکردن لەسەر چارەسەرکردنی کێشەکانی نێوان هەولێر و بەغدا.
سەرۆکی نوێنەرایەتیی حکومەتی هەرێمی کوردستان لە بەغدا گوتی: “لەنێوان هەردوو شاندەکەی هەولێر و بەغدا سێ لیژنەی لاوەکی و تەکنیکی هەن بۆ گفتوگۆکردن و گەیشتن بە رێککەوتن لەسەر پرسی بودجە، دەروازە سنوورییەکان، یاسای نەوت و گازی فیدرالی. گفتوگۆکان بەشێویەکن ئێستا لە بابەتی بودجە نزیکین لە رێککەوتنی کۆتایی
فارس عیسا باس لەوە دەکات کە لە نێوان هەولێر و بەغدا لەسەر هێڵە گشتییەکانی رەشنووسی یاسای نەوت و گاز لێکتێگەیشتن هەیە و کار لەسەر ئامادەکردنی رەشنووسەکە دەکەن.