سەرۆکایەتی پەرلەمان و سەرۆک فراکسیۆنەکان بۆ گفتوگۆکردن لەبارەی هەمواری یاسای هەڵبژاردن و کاراکردنەوەی کۆمیسیۆن کۆدەبنەوە.
مونا قەهوەچی، سکرتێری پەرلەمانی کوردستان رایگەیاند، دووشەممەی داهاتوو سەرۆکایەتی پەرلەمان و سەرۆک فراکسیۆنەکان کۆدەبنەوە.
گوتیشی “کۆبوونەوەکە بۆ گفتوگۆکردن و راوێژکردنە لە بارەی هەنگاوە یاسایی و سیاسیەکان بۆ هەمواری یاسای هەڵبژاردن و کاراکردنەوەی کۆمیسیۆن”.
ئەمەش لەکاتێکدایە کە لە چەند رۆژی رابردوو سەرۆک بارزانی لە کۆبوونەوەیدا لەگەڵ برێت مەکگۆرك نێردەی سەرۆکی ئەمریکا بۆ کاروباری رۆژهەڵاتی ناوەڕاست و ئەفریقا رایگەیاند، هیچ بیانوویەك بۆ دواخستنی هەڵبژاردن قبووڵ ناكرێت و پێویستە ئەمساڵ لە هەرێمی كوردستان هەڵبژاردنێكی پاك و بێگەرد بەڕێوە بچێت.