لە سلێمانی كارەبای 621 شوێنی بازرگانی دەبڕدرێت
بەڕێوەبەری دابەشكردنی كارەبای سلێمانی دەڵێت، كارەبای 621 شوێنی بازرگانییان لە سلێمانی بڕیوە، بەهۆی ئەوەی قەرزی كارەبایان لابووە و نەیانداوەتەوە.
هیوا عەبدوڵڵا، بەڕێوەبەری دابەشكردنی كارەبای سلێمانی رۆژی یەکشەممە، 25-12-2022، بە تۆڕی میدیایی رووداوی راگەیاند، هەموو ئەو شوێنە بازرگانییانەی پارەیەكی زۆری كارەبایان لابووە، بەهۆی نەدانەوەی پارەكەوە كارەبایان بڕاوە و گوتی: “لەم ماوەیەدا 621 شوێنی بازرگانی كارەباكەیان بڕاوە. لەو ژمارەیە 121 شوێنیان قیستی كارەبا قەرزدار بوون و پارەکەیان نەداوەتەوە؛ بۆیە كارەباكەیان بڕاوە. ئێستا بەشێك لەوانە هاتوون پارەیان داوە و كارەبایان بۆ گەڕاوەتەوە”.
بەڕێوەبەری دابەشكردنی كارەبای سلێمانی باسی لەوەش كرد کە ئەمڕۆ یەكشەممە سەرەڕای ئەوەی کە پشووە، بەشێك لە كارمەندەكانیان لەسەر کارن بۆ وەرگرتنەوەی قەرزی كارەبا و چاككردنەوەی كارەبای هەندێ‌ک شوێن كە كێشەیان تێدا بووە و گوتیشی: “ئەگەر پێویستی كرد، لەم هەفتەیەدا رۆژێكی دیكە لەسەر کار دەبن بۆ راییکردنی کاری هاونیشتمانییان”.