سەرۆک بارزانی پێشوازیی لە کونسوڵی گشتیی ئەڵمانیا لە هەولێر کرد

ڕۆژی سێسەممە 20ی کانوونی یەکەمی 2022 لە سەلاحەددین، سەرۆک مەسعود بارزانی پێشوازیی لە بەڕێز کلاوس شترایشەر، کونسوڵی گشتیی ئەڵمانیا لە هەولێر کرد.

لە دیدارەکەدا بیروڕا لەبارەی بارودۆخی سیاسیی ناوچەکە بەگشتی و عێراق بەتایبەتی ئاڵوگۆڕ کران و ڕۆشنایی خرایە سەر پەیوەندییەکانی نێوان هەرێمی کوردستان و بەغدا و بەرنامەی کاری حکوومەتی تازەی عێراق.

هەر لەو دیدارەدا جەخت لە جێبەجێکردنی ڕێککەوتننامەی نێوان حکوومەتی فیدراڵیی عێراق و حکوومەتی هەرێمی کوردستان لەبارەی شنگال کرایەوە. ئەویش بۆ گەڕاندنەوەی سەقامگیری بۆ دەڤەری شنگال و کۆتاییهاتنی بارودۆخی ئاوارەیی خەڵکی شنگال و گەڕانەوەیان بۆ زێدی باب و باپیرانیان.

هەڕەشەکانی تیرۆر تەوەرێکی تری ئەو کۆبوونەوەیە بوو، کونسوڵی ئەڵمانیا لە هەولێر ئەوەی دووپات کردەوە کە وڵاتەکەی لە شەڕی تیرۆردا بە هاوبەش و پشتیوانی هەرێمی کوردستان و عێراق دەمێنێتەوە و سەقامگیری و پێشکەوتنی هەرێمی کوردستان بەلای ئەڵمانیاوە بایەخی تایبەتی هەیە.

هەر لەو دیدارەدا سەرۆک بارزانی سوپاسی حکوومەت و گەلی ئەڵمانیای کرد کە لە شەڕی دژی تیرۆردا یارمەتیی گەلی کوردستانیان داوە و پەیوەندییەکانی نێوان گەلی کوردستان و گەلی ئەڵمانیای بە مێژوویی و دۆستانە وەسف کرد.