سه‌رچاوه‌یه‌ك: رێککەوتن لەبارەی کابینەی نوێی حکوومەتی عێراق کراوە، و پشکی کورد چوار وەزارەتە
سەرچاوەیەکی ئاگادار لە بەغدا ئاشکرایکرد، رێککەوتن لەبارەی کابینەی نوێی حکوومەتی عێراق کراوە، ھاوکات پشکی لایەنەکان دیاریکراوە و رۆژی شەممەش بڕیارە دەنگی لەسەر بدرێت.
سەرچاوەیەکی ئاگادار لە بەغدا، بۆ ماڵپەڕی فەرمیی پارتی دیموکراتی کوردستان گوتی: “دوای راسپاردنی محەمەد شیاع سوودانی بۆ پێکھێنانی کابینەی نوێی حکوومەتی عێراق لایەنەکان لەسەر ئەو کابینەیە رێککەوتوون و کابینەکە ئامادەکراوە و بڕیارە کاندیدی راسپێردراو بۆ پۆستی سەرۆکوەزیران کابینەی خۆی رۆژی شەممە بێنێت بۆ پەرلەمان و دەنگی لەسەر بدرێت و پەسەند بکرێت”.
سەرچاوەکە زیاتر گوتیشی: “پشکی کورد لەکابینەی نوێی حکوومەتی عێراق چوار وەزارەتە، کە سێ وەزارەتی بۆ پارتی دیموکراتی کوردستانە و یەکێک لەوانە سیادییە، ئەوانیش باس لەوە دەکەن وەزارەتی دەرەوە و ئاوەدانکردنەوە و دادە، بەڵام ھێشتا ھەر گفتووگۆی بەردەوام دەکرێت”.