ڕاپەڕینی ئازادی و سەربەستی
لە 7ی ئازاری ١٩٩١ و دوای دووڕۆژ لە ڕاپەینی جەماوەری ڕانییە بە هاوکاری هێزەکانی پێشمەرگەی کوردستان کە پێکهاتبوو لە هێزەكانی بەرەی كوردستانی كە خۆی لە هەشت هێزی سەرەكیدا دەبینیەوە و پارتی دیموكراتی كوردستان ڕۆڵێكی سەرەكی تێدا بینی توانرا بە پاڵپشتی هێزی جەماوەری كوردستان ، ڕاپەڕین لە شاری سلێمانی دەستپێبكات لە ڕۆژانی دواتردا، بۆ ناوچەکانیتر تەشەنەی سەند. و لە بازیان و دەشتی بیتوێنەوە پەڕیوە بۆ سلێمانی و چەمچماڵ، هەڵەبچە، عەربەت، زەڕاین، سەمود، و باریکە، پیرەمگرۆن، راپەرینی كوردستان جیاواز لە راپەرێنەكانی خواروی عێراق كە دروشمی ئاینی بوو لە كوردستان بە دروشمی نەتەوەیی و سیاسیی درێژەی پێدرا .
لەوانەش دیموکراسی بۆ عێراق، ئۆتۆنۆمی بۆ کوردستان، سەربەخۆیی و ئازادی بۆ میللەت.
خەڵکی ڕاپەڕیوی كوردستان لە هەموو شارەکانەوە هێشیان كردە سەر دواین قەلای بەعس لە شارەكە كە بۆ چەندین ساڵ ناوەندی ئەشکەنجە و كوشتنی خەڵكی سلێمانی بوو
بەرێوبەرایەتی ئەمنی سلێمانی کە بە (ئەمنە سورەکە) ناسرابوو، یەکێك بوو لە زیندانە ترسناکەکان حكومەتی بەعس .
ئەمنە سورەكە ناوێكی تۆقێنەر بوو، شوێنێك بوو بۆ سڕینەوەی ناسنامەو كلتورو شوناس‌و مێژووی نەتەوەی كورد
حكومەتی بەعس بڕیاردەدات بازنەی سەركوتكاری‌و كوشتن لەسنووری سلێمانیدا فراوانتر بكات، رۆژی 30/9/1979 لەسەر رووبەری 17 هەزار مەتردووجا بەردی بناغەی بینای ئەمنەسوورەكە دانرا ، كە لەلایەن چەند ئەندازیارێكی ئەڵمانی نەخشەسازی بۆ كرابوو، تاساڵی 1985 بەسێ قۆناغ سەرجەم كارەكانی تەواوكران،.
قۆناغی سێیەمیش كە بەشی زیندانەكانە، لەلایەن كەسانی بەعسی‌و باوەڕپێكراوەوە كاری تێداكراوە، دیوارەكانی ڕەنگی سوور كراو هەر بەوهۆیەشەوە ناونراوە ئەمنەسوورەكە..
بەو شێوەیە بووە ناوەندەی سەركوتكاری‌و قەتڵوعامی خەڵكی سلێمانی كە بەدڕندەترین شێوە گەنج و منداڵ و ئافرەت و بەساڵاچوی تێدا ئەشكەنجە دەدرا
لەو سەردەمەشدا جگە لەئەمنی سلێمانی، قوەی تەواری و رێكخراوی حەتین بۆ جەیش شەعبی و رێكخراوی عوسمان محەمەد فایەق و ئەمنی ئیقتیسادو ئیستیخبارات‌و فیرقەو چەندین ناوەندی سەركوتكاری تر لەناو سلێمانیدا بوونیان هەبوو”.
لە ڕاپەرینی 7 -3 ی شاری سلێمانیدا توانرا ئەمنی سلێمانی پاكبكرێتەوە و هەموو زیندانییەكان ئازادكران و هەزاربەڵگەنامەی حکومەت پەیوەست بە جینۆسایدی ئەنفال و کیمیاباران و رەشبگیری خەڵک و پاکتاوی رەگەزی ، دەست هێزەكانی كوردستان كەوتن .
بەڵگەنامەكان دەرخەری ئەوەبوون كە ڕژێمی بەعس بە سیستەماتیک سەدان هەزار کورد و پێکهاتە نەتەوەیی و ئایینەکانی دیكەی جینۆساید كردووە لە قڕكردنی نەتەوەی كورد دەستی نەپاراستووە .
بەدرێژایی مێژووی دەسەڵاتدارانی بەعس بە شێوازی جیاواز ئەشکەنجەی درێژە پێداوە و پەتی سیدارە هەڵواسیوە و کۆمەڵکوژی كردووە ، کۆی گشتی بەڵگەنامەکان بە 14 تۆن مەزەندەكران کە دواتر گواستراونەتەوە بۆ ئەمریکا.
ڕاپەڕینەکە سەرکەوت، سەدام حوسێن داوای لە سەرکردەی لایەنەکان کرد گفتوگۆ بکەن و ئەوانیش قبوڵیان نەکرد تا دوا خاڵی خاكی كوردستان بەكەركوكەوە ئازادكرا ڕژێمی بەعسیش بە شێوازێكی نوێ دوای خۆڕێكخستنەوەی درێژەی بە تاوانی جینۆساید دژی گەلی كوردستان داوو ، كۆڕەوی ملیۆنی گەلی كوردستانی بە دوادا هات .