ڕۆڵی سەرۆكی هەرێم لە تێپەڕاندنی ئاستەنگەكاندا
ڕۆڵی سەرۆكی هەرێم لە تێپەڕاندنی ئاستەنگەكاندا
بەگشتی پرۆسەی هەڵبژاردن خۆی ئامانجە وەك بزاوتێك ئەگەری گۆڕانكاری دێنێتە ئاراوە لە شێوازی بەڕێوەبردندا، ئەو دەرفەتە بۆتاك دەڕەخسێنێت له ڕێگه‌ی دەنگدانەوە به‌شداریی له حوكومڕانیدا بكات ، کاتێک پرۆسەكە یەكلایی دەبێتەوە هەڵبژاردن دەبێت بە هۆكار بۆ پێكهێنانی حكومه‌ت و دامەزراوەكان بە پێی خواستی زۆرینەی دەنگدەر. لە ڕێکەوتی20/1/2024 هەڵبژاردن لە هەرێمی كوردستان ئەنجامدرا ئەو قەوارانەی زۆرترین دەنگیان بەدەستهێناوە دەكەونە بەردەم بەرپرسیارییەتی پێكهێنانی حكومەت.
وتارەكەمان قسەكردن نییە لەسەر ژمارەی كورسی كییانە سیاسییەكان، یان كێ ڕادەسپێردرێت بۆ پێكهێنانی حكومەت!وەڵامی ئەوە هەرچۆنبێت په‌یوه‌سته به‌ناو خۆی هه‌رێمی كوردستانه‌وه و ئیعتبارێكی ئه‌وتۆی جیهانی نییه، ئه‌وه‌ی له ناوه‌نده دیموكراسییەكانی جیهاندا جێگەی بایەخ بێت ئەنجامدانی پرۆسەی هەڵبژاردنە وەك چەسپاندنی بنەماكانی دیموكراسی و پێكهێنانی ئەو دامەزراوانەیە كە شه‌رعییه‌تی هەڵبژاردنی هەیە.
پێكهێنانی دامەزراوەكان لە هەرێمی كوردساندا كۆمه‌ڵێك ڕەهەندی گرنگی هه‌یه كه ڕۆڵیان هه‌یه له ڕووبەڕووبوونه‌وه‌ی ئاڵنگارییەكانی بەردەم قەوارەی هەرێمی كوردستاندا. له حاڵی ئیستادا ڕۆژهەڵاتی ناوین له‌سه‌روبه‌ندی گرژی ئەمنی بەركەوتنی سەربازیدایە، به‌ڕای به‌شێك له شرۆڤه‌كارانی سیاسی ئەگەری تەشەنەكردنی زیاتری هەیە، دەرهاویشتەی ئەو جەنگەش كاریگەری ڕاستەوخۆی هەیە لەسەر ئایندەی هەرێمی كوردستان، ئەوەی ئێستا ده‌گوزه‌رێت نمایشی هێزەگەورەكان و تەسفییەكردنی ژمارەیەك لە هێزە بچوكەكانە. جیۆپۆلەتیكی هەرێمی كوردستان كه‌وتۆته ناوچه‌ی گه‌رمی شه‌ڕه‌كه‌وه، لەبەر ئەمەش پێویستی به ستراتیژیه‌تی هەنوكەی و دوور مەودا هەیە بۆ دورخستنه‌وه‌ی مه‌ترسییه‌كان، گرفته‌كه ئه‌وه‌یه كوردستان خاوه‌نی سه‌ره‌وه‌ری(سیادی) نییە، هیچ پارێزبەندیەكی پەیماننامەی نەتەوە یەگرتووەكان نایگرێتەوە، ته‌نها لە چێوەی عێراقدا مامه‌ڵه‌ی له‌گه‌ڵ ده‌كرێت، ئەوەش ڕوونە عێراق نه‌ك پارێزگاری له قەوارەی هەرێمی كوردستان ناكات، به پێچه‌وانه‌وه خوازیاری لە قاڵبدانیەتی، ته‌نها ده‌رفه‌تێكی گونجاو بۆ ئێستای كورد پێكهێنانی دامەزراوەی سەرۆكایەتی هەرێم وحكومه‌تی هه‌ڵبژێردراوه، ئەم هەنگاوە جگە لە بونیاتنانی سه‌قامگیریی ناوخۆو به‌رقه‌راركردنی ئاسایش بۆ هه‌رێمی كوردستان، یه‌كێكه لە بنه‌ماكانی دیموكراسی، ناوه‌نده یاساییه‌كانی جیهان ده‌خاته به‌رده‌م به‌رپرسیارییه‌تی ئاكارییه‌وه بەرامبەر بە هەرێمی كوردستان! تایبه‌تمه‌ندی پێكهێنانی دامەزراوه‌‌كان ئه‌وه‌یه؛شه‌رعییەتی هه‌ڵبژاردنیان هەیە و دەتوانن نوێنەرایەتی هەرێمی كوردستان بكەن له ناوه‌نده جیهانییه‌كاندا و به‌ناوی خه‌ڵكی كوردستانه‌وه قسەبكەن. خاڵیكی تری ئه‌رێنی ئه‌وه‌یه دامەزراوە هه‌ڵبژیردراوەكانی جیهان سروشتی هاوبه‌شیان هه‌یه، ئه‌م وێكچونه هاوبه‌شه هاوكاری هه‌رێم ده‌بێت له دورستكردنی كه‌ناڵی دیپلۆماسی و دابینكردنی هاوده‌نگی بۆ هەرێمی كوردستان.
ڕه‌هه‌ندێكی تری پێكهێنانی دامەزراوه هه‌ڵبژێردراوه‌كان لەوەدایە، له‌گه‌ڵ خواستی ئۆرده‌ری دیموكراسی جیهانی ده‌گونجێت. ڕه‌واتی هه‌یه به‌ناوی خه‌ڵكه‌كه‌یه‌وه داوای هاوكاری بكات بۆ ڕووبه‌ڕوو بوونه‌وه ئاڵنگارییە‌گەورەكان، چونكە دامەزراوەكان له بنه‌ڕه‌تدا پابه‌ندن به‌وه‌ی پارێزه‌ری به‌رژه‌وندیه‌كانی خه‌ڵكی خۆیان بن. هەروەها سه‌قامگیری سیاسی و ئاشتی كۆمه‌ڵایه‌تیش به‌رقه‌راربكه‌ن.
ئێستا بەهۆی هەلومەرجی سیاسی ناو خۆی هەرێمی كوردستانەوە، گریمانەی ئەوە دەكرێت پێكهێنانی حكومەت دوابكەوێت. له ده‌ستدانی كاتی زیاتریش نزیکبوونەوەیە لەمه‌ودای مه‌ترسییه‌كان. هەرێمی كوردستان پێویستی به هه‌وڵ و كۆششی هه‌موو لایه‌ك هه‌یه بۆ تیپەڕاندنی ئاسته‌نگه‌كانی به‌رده‌م پێکهێنانی حكومه‌ت و دامه‌زراوه یاسایەكان، لە ڕابردوودا سه‌رۆكی هه‌رێمی كوردستان ڕۆڵی به‌رچاوی هه‌بووه له كۆكردنه‌وه‌ی دیدگا جیاوازه‌كان له‌سه‌ر مێزی گفتوگۆ، به‌م پیوه‌دانگه‌ش چاوەكان دەچنەوە سەر نێچیرڤان بارزانی بۆ ده‌سپیێكردنی دیالۆگی سازانی نیشتمانی و كۆكردنەوەی لایەنەكان له ده‌وری پرسی پیكهێنانی حكومه‌ت. ئەنجامی هەرپێكهاتنێك قەواره‌ی هەرێمی كوردستان بەهێزدەكات به‌رامبه‌ر ئاڵنگاریەكان.