سەرۆکی لیژنەی یاسایی: دەنگی کورد بۆ هەڵبژاردنی سەرۆکی نوێی پەرلەمانی عێراق یەکلاکەرەوە دەبێت

سەرۆکی لیژنەی یاسایی لە پەرلەمانی عێراق دەڵێت، دەنگی کورد بۆ هەڵبژاردنی سەرۆکی نوێی پەرلەمانی عێراق یەکلاکەرەوە دەبێت. ئاماژە بەوەش دەدات، دەنگی شیعەکان بەسەر دوو بەرەدا دابەش بوون و دەنگ بە کاندیدایەکی هاوبەش نادەن.  

ئەمڕۆ شەممە، 18-05-2024، ڕێبوار هادی، سەرۆکی لیژنەی یاسایی لە پەرلەمانی عێراق، لەبارەی پرسی هەڵبژاردنی سەرۆکی نوێی پەرلەمانی عێراق؛ وتی  ئەمڕۆی پەرلەمانی عێراق بڕیاربوو کاتژمێر 01:00ـی دوانیوەڕۆ دەست پێ بکات، بەڵام بەهۆی تەواو نەبوونی ڕێژەی یاسایی، بۆ کاتژمێر 01:30 دواخرا. دانیشتنەکە لە سێ تەوەر پێک دێت؛ خوێندنەوەی دووەم بۆ پرۆژە یاسای پشووە فەرمییەکان، دووەم خوێندنەوە بۆ هەمواریی دووەمی یاسای کۆمیسیۆنی باڵای سەربەخۆی هەڵبژاردنەکان و هەڵبژاردنی سەرۆکی نوێی پەرلەمانی عێراق.