سەرۆک بارزانی: ئیرادەی گەلی کوردستان لە هەموو چەک و کۆمەڵکوژی و تاوانێک بەهێزترە
سەرۆک بارزانی لە ساڵیادی کیمیابارانکردنی بالیسان و شێخ وەسانان و دۆڵی خۆشناوەتی پەیامێکی بڵاوکردەوە و دەڵێت، ئیرادەی گەلی کوردستان لە هەموو چەکێک بەهێزترە.
رۆژی سێشەممە، 16ی نیسانی 2024، سەرۆک مەسعود بارزانی لە ساڵیادی کیمیابارانکردنی بالیسان و شێخ وەسانان و دۆلی خۆشناوەتی پەیامێکی لە تۆڕی کۆمەلایەتی ئێکس بڵاوکردەوە.
سەرۆک بارزانی دەڵێت: “ئیرادەی گەلی کوردستان لە هەموو چەک و کۆمەڵکوژی و تاوانێک بەهێزترە. لە 37ـەمین ساڵیادی تاوانی کیمیابارانکردنی بالیسان و شێخ وەسانان و دۆڵی خۆشناوەتی لە لایەن رژێمی پێشووی عێراقەوە هەزاران سڵاو بۆ گیانی پاکی شەهیدانی ئەو تاوانە و سەرجەم شەهیدانی کوردستان.”
ئەمڕۆ (سێشەممە، 16-4-2024)، 37 ساڵ بەسەر کیمیابارانکردنەکە تێدەپەڕێت. لە ساڵی 1987 رژێمی سەدام حوسێن بە چەكی كیمیایی بۆردوومانی هەردوو گوندی بالیسان و شێخ وەسانانی كرد و بەهۆیەوە زیاتر لە 200 كەس بە كاریگەریی ئەم چەكە گیانیان لەدەستدا، ژمارەیەك هاونیشتمانیش تاوەكو ئێستا بە دەست كاریگەرییە درێژخایەنەکانی ئەو چەكەوە دەناڵێنن.