خەونی ڕووخانی خود

زكری موسا

زەنگی داڕووخانی هەرێم لێدرا…گورزێكی تر بە هەرێم كەوت.. ئابووریی سەربەخۆ كۆتایی هات… هەرێمی كوردستان لە لێواری كەوتن دایە.. هەرێم هەڵدەوەشێتەوە.. هەرێم نامێنێ.. ئەم مانشێتانە بەشێكن لەو شەڕە ڕاگەیاندن و دەروونیانەی بە لێشاو و بە شێوەیەكی مونەزەم، ڕۆژانە لەدژی دانیشتوانی هەرێمی كوردستان و دامەزراوەكانی بەڕێوە دەچێت. ڕۆژانە زەین و هۆشی خەڵك بە هەواڵی ساختە و گرژ و بێمانا بۆردومان دەكرێن و یاری بە باری دەروونیی كۆمەڵگە دەکرێت. جێگەی هەڵوەستەكردنیشە ئەم شەڕ و ئەم دەنگە شوومانە لە لایەن دوژمن و داگیركارانەوە نایەت بەڵكو لە گەرووی دامودەزگەی ئیعلامی و سۆشیاڵمیدیای ئەو لایەن و حزبە كوردیانەوە دێت كە خۆیان بە ئۆپۆزیسیۆن دەزانن و ملیۆنان دۆلاری لێ سەرفكراوە و هەزاران كادیری بۆ تەیار كراوە.

ڕاستیتان دەوێ هیچ یەك لە نەیارە دەرەكییەكانی هەرێم ئەو جورئەتەیان نەبووە ڕێگە بە خۆیان بدەن، باس لە نەهێشتن و لەناوبردن و ڕووخانی هەرێم بكەن. كەچی ئەوانە بە هەناسەیەكی سارد و بە دڵخۆشییەوە ڕۆژانە مەستی خەونی ڕووخانی هەرێمەکەیانن و وەك موژدەیەك دەیڵێنەوە و دەیڵێنەوە. ئەو تەماح و دڵخۆشییە بۆ (ڕووخاندنی خود)ـە، چاوگەكەی تەنیا ڕقلێبوونەوە لە بزووتنەوەی ڕزگاریخوازی كورد یان پارتی نییە، كردەوەیەكی تەندروستی سیاسی و ڕۆژنامەوانیش نییە و لە زانایی و مەعریفە و ڕۆشنگەرییشەوە سەرچاوە ناگرێت، بەڵكوو جۆرێکە لە پەرێشانی و دیاردەیەكی سەدلەسەد دژەكولتوورییە كە دەبێ دیراسە بكرێت و هۆكارەكانی بدۆزرێنەوە و چارەسەر بكرێن.

ئایا تینوویەتی بۆ گرتنەدەستی دەستەڵات ئەوە دەهێنێت كە تۆ ئامادە بیت یاری بە هەبوو و نەبوو و خاك و سەرزەمین و مێژوو و ئێستا و ئاییندەی وڵاتت بكەی و چەپڵە بۆ داڕووخان لێ بدەی؟ سرووشتیە خەڵك هەبێت حەزی لە دەستەڵات بێت و هەوڵی بۆ بدات و ببێتە ئۆپۆزیسیۆن، بەڵام ئۆپۆزیسیۆنبوونیش ئسووڵی خۆی هەیە. تەنانەت ڕقڵێبوونەوە و دوژمنبوونیش فۆڕمۆڵ و پڕەنسیپ و ڕێوشوێنی خۆی هەیە. لە هیچ كامێك لەم شێوازانەدا شەیدایی بۆ ڕووخان و هەڵوەشانەوە و كەوتنی وڵات بوونی نییە.

،ئەگەر بەڕاستی خەمخۆری وڵاتن دەبێ باوەڕی پتەویان بە خاك و خەڵك و سەروەریی و هەبوو و نەبووی وڵاتەكەیان هەبێت و هەرگیز ئارەزووی ڕووخان و هەڵوەشانەوە و نەمانی نەکەن..

هەرێمی كوردستان موڵكی تاك تاكی هاووڵاتیانی هەرێمی كوردستان و لایەنە سیاسییەكان و دەستەڵات و ئۆپۆزیسیۆنە و دەبێ بە هاوكاری و هەماهەنگیی هەموو لایەك بپارێزرێت و بەهێز بكرێت و كەموكوڕییەكانی چارەسەر بكرێن. ئەمە نەخشەڕێگەی دروستی كاركردنە بۆ بەرژەوەندیی وڵات و نەوەكانی داهاتوو. بەڵام دڵخۆشی و شەیدایی بۆ ڕووخان و هەڵوەشانەوە، نە بوێرییە نە زانایی و نە شانازی، بەڵكو سەرلێشێوانێكی موتڵەقە و جێگەی بەزەییە.
سەیری مێژوو بکەن، لە شەرقەوە بگرە هەتا غەربی گۆی زەوی تێکڕای میللەتان لە پڕۆسەی گەیشتن بە ئارامی و ئاشتی و بەرپاکردنی دامەزراوەکان و بەرقەراریی یەکسانی ئاستەنگیان هەبووە. نەیاری سەرسەخت و داگیرکار و دوژمنیان هەبووه، لەگەڵ برسیەتی و جەنگ و پەتا و نەخۆشیدا دەستوپەنجەیان نەرم کردووە. بەڵام خاوەنی ئیرادە و مقاوەمە بوونە و تێکۆشاون و خۆیان بەدەست نەداوە، توانیویانە لەنێو دۆزەخدا بگەن بە ئارامی و پێشکەوتن و سەروەری.