بە هۆکارێک چوونە سەر شاخی بەرانان قەدەغە کرا

قایمقامی شارۆچکەی دەربەندیخان ڕایگەیاند، بە مەبەستی پاراستنی ئاژەڵە کێوییەکان لە ڕاوکردن بریارمان داوە بۆ ماوەی مانگێک ڕۆیشتنی هاووڵاتییان بۆ سەر شاخی بەرانان قەدەغە بکرێت.

سلێمان محەمەد، قایمقامی دەربەندیخان، ڕایگەیاند: “لەسەر داوا و پێشنیازی پۆلیسی دارستان و ژینگەی دەربەندیخان و بەهۆی (وەرزی جووتبوونی نێر و مێی مەڕ و بزنە کێوی) و لەپێناو سەلامەتیی ژینگەی ئاژەڵە کێوییەکان، بڕیارمان دا بە قەدەغەکردنی هاتوچۆ بۆ سەر شاخی بەرانان و ئەو شوێنانەی ئاژەڵی کێوێ لێیه”.

قایمقامی دەربەندیخان،گوتیشی: “بڕیارەکە بۆ ماوەی یەک مانگە و لەو ماوەیەدا لەلایەن مەفرەزەکانی بەشی پۆلیسی دارستان و ژینگەی دەربەندیخان بە شێوەی گەڕۆک و کامێرای چاودێری و لە ڕێگەی درۆنەوە چاودێریی شاخەکە دەکرێت و سەرپێچیکار ڕووبەڕووی ڕێکاری یاسایی دەکرێتەوە”.