ھیوا گەیلانی: بۆ زیاتر خزمەتی جەماوەر گۆڕانکاری حزبی ده‌كه‌ین
بەرپرسی لقی 11ی پارتی ئاشکرایکرد، پارتی دیموکراتی کوردستان لەدەڤەری راپەڕین گۆڕانکاری حزبی دەکات وتیشی ، ئێمە دەمانەوێ زیاتر بچینە ناو جەماوەر بۆ ئەوەی زیاتر خزمەتیان بکەین.
ھیوا گەیلانی، بەرپرسی لقی 11ی پارتی، راگەیاند: “دوای کۆنگرە چەندین گۆڕانکاری لەناو پارتی کراون و ئێمەش لە سنووری راپەڕین و لقی 11 بەنیازی ئەنجامدانی گۆڕانکاری حزبین لە بەرپرسی ناوچەکان و مەکتەبەکانی لقی 11ی راپەڕین، ئەو گۆڕانکاریانەش لەژێر رۆشنایی بڕیارەکانی کۆنگرەی 14ی پارتیمان و جێبەجێکردنی پەیڕەوی ناوخۆی حزبە”.
ھیوا گەیلانی ئاماژەی بۆ ئەوەکرد: “پارتی خۆی حزبێکی جەماوەریە و بەردەوام لەنێو خەڵکدا بووە، لەم قۆناغەشدا ئێمە دەمانەوێ زیاتر بچینە نێو جەماوەری کوردستان بۆ ئەوەی بتوانین زیاتر خزمەتی جەماوەر بکەین، خزمەتکردنی ھاووڵاتیانیش بە ئەرکی خۆمانی دەزانین”.