پێشبینی دەكەین”ساڵی داهاتوو پرۆژەی پەروەردە بکەوێتە واری جێبەجێکردنەوە”

یەکێک لە پرۆژەکانی کابینەی نۆیەمی حکوومەتی هەرێمی کوردستان بۆ خزمەتی کەرتی پەروەردە دانانی پرۆژەیەکی تایبەت بە پەروەردەیە کە لە 185 ماددەی تایبەت بە کەرتی پەروەردە پێک هاتووە و پێشبینی دەکرێت ساڵی داهاتوو پەیڕەو بکرێت.

گوڵستان باقی، ئەندامی لیژنەی پەروەردەی پەرلەمانی کوردستان، ڕاگەیاند: ”پرۆژەی پەروەردە کە لە ئەنجوومەنی وەزیرانەوە ڕەوانەی پەرلەمانی کوردستان کراوە، زیاتر لە ساڵێک کارمان لەسەر کردووە و باشترین کاری لەسەر کراوە و ئامانج لە دانانی پرۆژەکەش ڕێکخستنی زیاتری سیستەمی خوێندن لە کەرتی پەروەردەیە و لە 185 ماددە پێک هاتووە. پێشتریش یاسای پەروەردەمان هەبوو، بەڵام وەکوو ئەم پرۆژەیە مەزن و باش نەبووە. بە خۆشییەوە لەم خولەی پەرلەماندا باشترین کار لەسەر پرۆژەی پەروەردە کرا و دەبینە هۆی ئەوەی کە لە داهاتوودا پلان و هۆشیارییەکی باشمان هەبێت.”

گوتیشی: ”هەموو ماددەکانی ئەم پرۆژەیە گرنگن و گرنگترینیان باس لە ژینەگەیەکی باش و ڕێکخراو لەناو کەشی قوتابخانەکاندا دەکات بۆ ئەوەی قوتابی بتوانێت باشترین زانست لە قوتابخانە وەرگرێت.”

جەختیشی کردەوە: ”پرۆژەکە بۆ دواین تیبینی ڕەوانەی سەرۆکایەتیی هەرێمی کوردستان کراوە و پێشبینی دەکەین ساڵی داهاتووی خوێندن ئەو پرۆژەیە لە سەرتاسەری هەرێمی کوردستان بکەوێتە واری جێبەجێکردنەوە.”