بەنزینی 690 دیناریی عێراق لە هەرێمی کوردستان دابەش دەکرێت

دوای نزیکەی ساڵێک وەستان لە ناردنی بەنزینی 690 دیناریی عێراق بۆ هەرێمی کوردستان، ناردنی بەنزین بەو نرخە بۆ هەرێمی کوردستان لەلایەن عێراقەوە دەستیپێکردەوە.

نەبەز عەبدولحەمید، قایمقامی هەولێر دەڵێت ، لە هەولێر دوو جۆر بەنزینی 690 دیناری دابەش دەکرێت، ئەوەی بە تاکسی دەدرێت لەلایەن حکومەتی هەرێمی کوردستانەوە دابیندەکرێت، ماوەی چەند رۆژێکیشە لەلایەن حکومەتی عێراقەوە بەنزینی 690 دیناری بۆ هەولێر دەنێردرێت و دەدرێتە ئۆتۆمبێلی تایبەت و پاس.

قایمقامی هەولێر ئاماژەی بەوەشکرد، کە رۆژانە پێنج تانکەر بەنزینی 690 دیناری عێراق دەگاتە هەولێر کە 180 هەزار لیترە و دەدرێتە ئۆتۆمبێلی تایبەت و پاس.

لە پشکی پارێزگای هەولێر رۆژانە تانکەرێک بەنزیکی 690 دیناری عێراق، کە 36 هەزار لیتری تێدایە رەوانەی سۆران دەکرێت.

سەلام عومەر، ئەندامی لیژنەی نەوت لە بەڕێوەبەرایەتیی نەوت و کانزاکانی سلێمانی دەڵێت دوو رۆژە ناردنی بەنزینی 690 دیناریی بۆ پارێزگاکانی سلێمانی و هەڵەبجە، ئیدارەکانی گەرمیان و راپەڕین دەستیپێکردووەتەوە و هەموو ئۆتۆمبێلێکی تایبەتیش دەتوانێت بەو نرخە بەنزین وەربگرێت.

بە گوتەی سەلام عومەر، رۆژانە 6 تانکەر بەنزین رەوانەی ئەو سنوورانە دەکرێن کە هەریەکەیان 36 هەزار لیترە؛ سێ تانکەریان بۆ سلێمانی، یەک بۆ هەڵەبجە، یەکێک بۆ گەرمیان و یەکێکیشیان بۆ ئیدارەی راپەڕینە.

وێڕای دابەشکردنی بەنزینی 690 دینار بۆ ئۆتۆمبێلی تایبەت، نرخی بەنزینی بازرگانی وەکو خۆی ماوەتەوە، بەهمەن شێخ قادر، گوتەبێژی بەنزینخانەکانی سلێمانی گوتی، نرخی بەنزین وەکو خۆی ماوەتەوە و لیتری نۆرماڵ 975 دینارە.

پێش ناردنی بەنزین لەلایەن حکومەتی عێراقەوە، وەزارەتی سامانە سرووشتییەکانی هەرێمی کوردستان بەنزینی بۆ تاکسییەکان بە نرخی لیتری 690 دینار دابین دەکرد و بەردەوامە.

ناردنەوەی بەنزین بە نرخی 690 بۆ لیترێک بۆ هەرێمی کوردستان لەلایەن حکومەتی فیدراڵیی عێراقەوە دوای ئەوە دێت، کە رۆژی 13-03-2023 محەممەد شیاع سوودانی، سەرۆکوەزیرانی عێراق دوای پەسند کرنی پڕۆژەیاسای بودجەی ساڵانی 2023، 2024 و 2025، کۆنفرانسێکی رۆژنامەڤانیی ساز کرد و گوتی، لەگەڵ حکومەتی هەرێمی کوردستان لەسەر تەواوی کێشە هەڵپەسێردراوەکانی نێوان هەولێر و بەغدا گەیشتوونەتە رێککەوتن.