لە گوندی گاپیلۆنی سه‌ربه‌شارباژێڕ ژنێک بەهۆی کڵپەی گازەوە بەشێکی جەستەی دەسووتێت
لە گوندێکی شارباژێڕ بەهۆی لێچوونی گازەوە ئاگر لە ماڵێک کەوتەوە و بەهۆیەوە ژنێک بریندار بوو.
کامەران عەبدوڵڵا، بەڕێوەبەری ناحیەی گاپیڵۆن بە رووداوی راگەیاند، ئەمڕۆ دووشەممە 26-12-2022 لەنێو ماڵێکی گوندی گەورەدێی شارباژێڕ بەهۆی لێچوونی بوتڵێکی گاز، ئاگر کەوتەوە و بەشێک لە جەستەی ژنێک سووتا.
بەڕێوەبەری ناحیەی گاپیڵۆن گوتیشی، ئەو ژنە بە تەنیا لەو ماڵەدا ژیاوە، لە کاتی ئامادەکردنی خواردندا چەرخی بەکارهێناوە، بەڵام نەیزانیوە بوتڵی گازەکە لێیچووە، بۆیە ئاگر کەوتووەتەوە و سووتاوە.
لەبارەی زیانەکانی دیکەوە، کامەران عەبدوڵڵا ئەوەی خستەڕوو، خانووەکە زۆر زیانی بەرکەوتووە، بەڵام ژنەکە گەیێندراوەتە نەخۆشخانەى شار و تەندروستیی جێگیرە.
ئەم رووداوە لە کاتێکدایە، هەفتەى رابردووش بەهۆی رووداوێکی هاوشێوە لە سلێمانی، ژنێک گیانی لەدەستدا.