خۆپیشاندان له رۆژهه‌ڵاتی كوردستان به‌رده‌وامه و 9 لاوی كوردی دیكه‌ش ده‌ستگیركران
لە درێژەی دەستگیركرانی هاووڵاتییانی کورد بە هۆی بەشداریان له‌خۆپیشاندان و ناڕەزایەتییەکانی خەڵک لە دژی کوژرانی ژینا ئەمینی لانی کەم 9 هاووڵاتی دیکە بە ناوەکانی؛ مەسعوود محەممەدی، سیروان ناسرزادە، ئارمان حەمیدی، ماهان عەبدوڵڵاهی، یوونس ئەحمەدی، ڕێبین عەلیاری، عەلی محەممەد ئەرشەد، سۆران سلێمان پوور و فەردین ئەڵڵامورادی لەلایەن هێزە ئەمنییەکانی حکومەتی کۆماری ئیسلامی ئێرانەوە دەستگیركران.
بەگوێرەی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی پێنجشەممە، ڕێکەوتی 29 ی 9 ی 2022، دوو هاووڵاتی خەڵکی شنۆ بە ناوەکانی مەسعوود محەممەدی و سیروان ناسرزادە لەلایەن هێزە ئەمنییەکانەوە ڕفێنراون و هیچ زانیارییەک لەبارەی شوێنی دەستبەسەرکران و چارەنووسیان لەبەردەستدا نییە.
لە لایەکی دیکەوە، ڕێبین عەلیاری 28 ساڵ و خەڵکی سەردەشت، ڕۆژی پێنج شەممە، ڕێکەوتی 29 ی 9 ی 2022، لە خۆپیشاندانەکانی خەڵک لە دژی کوژرانی ژینا ئەمینی لەلایەن هێزە ئەمنییەکانەوە دەستگیركراون و هەتا ئێستا ئازاد نەکراوە.
ڕۆژی شەممە،1 ی 10 ی 2022، ماهان عەبدووڵاهی 24 ساڵ، خەڵکی سەقز و ڕۆژی یەکشەممە، 2 ی 101 ی 2022، ئارمان حەمیدی 30 ساڵ، خەڵکی کامیاران لەلایەن هێزە ئەمنییەکانەوە لە ماڵەکانی خۆیان دەستبەسەرکراون و چارەنووسیان ناڕوونە.
هەروەها، ڕۆژی دووشەممە، 3 ی 10 ی 2022، عەلی محەممەد ئەرشەد خەڵکی پیرانشار، لەلایەن هێزە ئەمنییەکانەوە ڕفێنراوە و سەرەڕای بەدواداچوونەکانی بنەماڵەکەی، هیچ هەواڵێک لەبارەی چارەنووس و شوێنی ڕاگیرانی لەبەردەستدا نییە.
لە درێژەی ئەم دەستگیركراوانه‌دا، یوونس ئەحمەدی خەڵکی شاری سەقز، لەلایەن هێزە ئەمنییەکانەوە دەستگیركراوه و بۆ شوێنێکی نادیار گوازراوەتەوە.
هەنگاو زانیویەتی کە لە شاری تیکاب، هێزە ئەمنییەکان هاووڵاتییەکی کوردیان بە ناوی فەردین ئەڵڵامورادی دەستگیركردووه و گواستوویانەتەوە بۆ بەندیخانەی ناوەندیی ئورمیە.
هەروەها، لاوێكی خەڵکی ڕەبەت بەناوی سۆران سلێمان پوور کە هەفتەی ڕابردوو لەلایەن هێزە ئەمنییەکانەوە گیرابوو، ئازاد کراوە.