ڤیان سەبری: سوودانی وەزیری دارایی ڕاسپاردووە مووچەی مانگی 10 خەرج بکات

سەرۆک وەزیرانی عێراق، وەزیری دارایی ڕاسپارد مووچەی مانگی 10ـی فەرمانبەرانی هەرێمی کوردستان خەرج بکات.

ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق ڕاگەیاند: “دوێنێ شەممە، 16-11-2024، لەگەڵ محەممەد شییاع سوودانی، سەرۆک وەزیرانی فیدراڵی کۆ بوومەوە و تاوتوێی کۆمەڵێک پرسی دارایی و ئابووریمان کرد.”

وەکوو ئەوەی سەرۆکی فراکسیۆنی پارتی باسی کرد، سوودانی پێی گوتووە “تەیف سامی، وەزیری دارایی عێراقم ڕاسپاردووە، ئیمزای خەرجکردنی مووچەی مانگی 10ـی فەرمانبەرانی هەرێمی کوردستان بکات و ڕێکارەکانی ناردنی پارە لە وەزارەتی دارایی تەواو بکەن.”

لەبارەی پارەی گەنمی جووتیارانی هەرێمی کوردستانیش، ڤیان سەبری گوتی: “سەرۆک وەزیرانی عێراق دڵنیایی پێدام، لە ماوەیەکی نزیکدا تەواوی پارەی گەنمی جووتیاران خەرج دەکرێت.”