نێچيرڤان بارزانى سوپاسى كۆمیسيۆنى باڵاى سه‌ربه‌خۆى هه‌ڵبژاردنه‌كان ده‌كات
نێچيرڤان بارزانى، سه‌رۆكى هه‌رێمى كوردستان، پێشوازیی له سه‌رۆك و ئه‌ندامانى كۆمیسيۆنى باڵاى سه‌ربه‌خۆى هه‌ڵبژاردنه‌كان و هه‌موو ئه‌و تيمانه‌ى كۆمیسيۆن كرد، كه سه‌رپه‌رشتيى هه‌ڵبژاردنى په‌رله‌مانى كوردستانيان كرد و سه‌ركه‌وتووانه پرۆسه‌ى ده‌نگدانيان به‌ڕێوه برد.
نێچيرڤان بارزانى “سوپاس و پێزانينى بۆ ئه‌رك و كارى كۆمیسيۆن و بۆ پشتيوانى و هاريكاريى سه‌رۆك وه‌زيرانى فيدراڵ و ده‌سه‌ڵاتى دادوه‌ريى عێراق دووپات كرده‌وه و ستايشى خزمه‌ت و ماندووبوونيانى له به‌ڕێوه‌بردن و سه‌رخستنى هه‌ڵبژاردن و پرۆسه‌ى ده‌نگداندا كرد. هه‌روه‌ها داكۆكیى له‌وه كرده‌وه كه به هه‌موو پێوه‌ره‌كان، ئه‌م هه‌ڵبژاردنه بۆ هه‌رێمى كوردستان زۆر گرنگ بوو.”
ئاماژه‌ى به‌وه‌ش دا “سهركهوتنى هه‌ڵبژاردن، ئه‌نجامى ڕۆڵ و په‌رۆشى و دڵسۆزى و هاريكاريى كۆمسيۆن بوو له‌گه‌ڵ هه‌موو لايه‌نه په‌يوه‌نديداره‌كان له هه‌رێمى كوردستان، بۆ ئه‌وه‌ش، ده‌‌ستخۆشیى لێ كردن و هيواى سهركهوتنى بۆ خواستن.”
لاى خۆيانه‌وه كۆمیسيۆنى باڵاى سه‌ربه‌خۆى هه‌ڵبژاردنه‌كان “پيرۆزبايي سهركهوتنى هه‌ڵبژاردنيان له نێچيرڤان بارزانى و هه‌رێمى كوردستان كرد و ستايشى ته‌واوى پرۆسه‌كه‌يان كرد، كه هه‌ر له بانگه‌شه‌ى هه‌ڵبژاردنه‌وه تا به‌ڕێوه‌چوونى ده‌نگدان، پرۆسه‌يه‌كى سه‌ركه‌وتوو بوو، به شێوه‌يه‌ك کە جارى يه‌كه‌مه له عێراق و هه‌رێمى كوردستان، هيچ تانه‌يه‌كى سوور له‌سه‌ر هه‌ڵبژاردن تۆمار نادرێت.”