پارتی ڤیتۆی له‌سه‌ر هیچ لایه‌نێك نییه
به‌رپرسی مه‌كته‌بی ڕێكخستنی پارتی له سلێمانی و هه‌ڵه‌بجه، ڕایگەیاند، هه‌ڵبژاردنی ئه‌مجاره‌ی په‌رله‌مانی كوردستان به‌شێوه‌یه‌كی دیموكراسییانه به‌ڕێوه‌چوو و سه‌نگی هه‌ر لایه‌نێك تێیدا به‌ده‌ر كه‌وت، هەروەها بۆ پێكهێنانی حكوومه‌تی ئایینده پارتی ڤیتۆی له‌سه‌ر هیچ لایه‌نێك نییه.
عه‌لی حوسێن، به‌رپرسی مه‌كته‌بی ڕێكخستنی پارتی له سلێمانی و هه‌ڵه‌بجه له كۆنفرانسێكی رۆژنامه‌وانیدا، گوتی: ئه‌مجاره‌ش پارتی توانی ده‌نگه‌کانی لە هەڵبژاردن زیاد بكات و له هه‌ڵه‌بجه‌ش كورسی به‌ده‌ست بهێنێت و ئه‌و سه‌ركه‌وتنه‌ی پارتی سه‌ركه‌وتنی ته‌واوی خه‌ڵكی كوردستانه.
هاوکات ئاماژەی بەوە دا، هه‌ڵبژاردنی ئه‌مجاره‌ی په‌رله‌مانی كوردستان به‌شێوه‌یه‌كی دیموكراسییانه به‌ڕێوه‌چوو و سه‌نگی هه‌ر لایه‌نێك تێیدا به‌ده‌ركه‌وت.
به‌رپرسی مه‌كته‌بی ڕێكخستنی پارتی له سلێمانی و هه‌ڵه‌بجە، دەڵێت: بۆ پێكهێنانی حكوومه‌تی ئایینده پارتی ڤیتۆی له‌سه‌ر هیچ لایه‌نێك نییه و هه‌ر قه‌واره‌یه‌كی سیاسی ئاماده بێت بۆ پیاده‌كردنی كارنامه‌ی حكوومه‌تی داهاتوو، پارتیش لاریی نییه له‌گه‌ڵی بچێته حكوومه‌تی نوێ.
ناوبراو دووپاتی کردەوە، پێویسته حكوومه‌تی داهاتوو، حكوومه‌تی خه‌ڵك بێت و چیتر حزب شوێنی حكوومه‌ت نه‌گرێته‌وه له به‌ڕێوه‌بردنی کاروبارەکانی وڵات.
یەکشەممە 20ـی تشرینی یەکەمی 2024، دەنگدانی گشتی بۆ هەڵبژاردنی خولی شەشەمی پەرلەمانی کوردستان بەڕێوەچوو، کە دوو ملیۆن و 686 هەزار و 578 دەنگدەر مافی دەنگدانیان هەبوو، بەڵام بە گوێرەی ئامارەکانی کۆمیسیۆنی باڵای سەربەخۆی هەڵبژاردنەکانی عێراق دوو ملیۆن و 87 هەزار و 972 کەس بەشدارییان لە دەنگدان کرد و ڕێژەی بەشداری %72 بوو. بەرزترین ڕێژەی بەشداری لە بازنەی دهۆک تۆمارکراوە کە دهۆك 78% بوو، لە هه‌و‌لێر 74%، سلێمانی 65% و هه‌ڵه‌بجه 69% بووە.