بانکی ناوەندیی عێراق، بە بڕی 11 ملیۆن دۆلار سزا درا

دادگای ناوبژیوانی نێودەوڵەتی پاریس بڕیارێکی دژی بانکی ناوەندی عێراق دەرکرد و پابەندی کرد بە پێدانی ١١ ملیۆن دۆلار بە کۆمپانیایەکی بیانی.

دادگای ناوبژیوانی نێودەوڵەتی لە پاریس، بەهۆی سکاڵایەکی کۆمپانیای کاردنۆ ئێم ئی (CME) کە لە 26ی شوباتی 2023 دا لە دژی بانکی ناوەندیی عێراق تۆماری کردبوو، لەبارەی ڕێگرییەکانی بانکەکە لە دروستکردنی بنکەیەکی نوێی کۆمپانیاکە لە بەغدا و دەستبەسەرکردنی ئەندازیار و کارمەندانی کۆمپانیاکە لەلایەن عێراقەوە بە کارێکی نایاسایی ناساندووە.

پێشتر بانکی ناوەندیی عێراقی بە تۆمەتی “پێدانی زانیاریی ناراست و فێڵ و قۆڵبڕین” کۆمپانیای کاردنۆ ئێم ئی داوەتە دادگا و بریاری پێنج ساڵ زیندانی بۆ ئەندازیارە ئوسترالییەکەیان ڕۆبەرت پیتەر و هاوکارە میسریەکەی خالد ڕەدوان دەرکردووە لەگەڵ پێبژاردنی 12 ملیۆن دۆلار وەک قەرەبوو.